HadeeL

ياحظكم فيني :p

HadeeL — Tue, 08 Jul 2008 06:54:34 +0000

أعتذر اعتذار شديد عن انشغالي بالفترة الاخيرة وغيابي عن المدونة

مدري وشلون انواع ضغوطات والتزامات وظروف تجبرك حولك

بس يخليك الشيء هذا مالك مزاج لأي شيء والله حتى ساعات نومي قلت اخر يومين

نمت فقط اربع ساعات !! تخيلوا انرحم صح

وبعدين حاسة أني متغيره عن أول مدري

( وش بتقولين لهم انتي بزر وكبرتي يعني )

حتى قاعدة اطقطق لكم بالكيبورد وأنا مدري وش أكتب يالله مشوا حالكم

وودي اسوي اشياء لمدونتي بعد ماتعلمتها ومدري يمكن اغير الثيم اذا فضيت

بس حبيت أقول لكل من علق في مواضيعي إن شاءالله راح ارد عليكم واعتذر لكم عن التأخير

والله فقدتكم مره مره ياحبيلكم

واشكركم ياللي ترسلون لي يا زائرينا الأفاضل الحبوبين يعطيكم الف عافية

واعتذر عن الرد في بعضها واتمنى ماتزعلون مني

وبعدين وش سالفة الواجبات ؟ هههههههه يا أخوانا الأفاضل والاخوات الفاضلات

محدثتكم هديل هذي ماتحب أي شي اسمه واجب

والله مالي خلق جد ولا أحبه اعتذر لكم اعتذار شديد شديد داير أنا زولة

ويالله امشي حالي وأنا أطقطق عليكم

وراح يكون هناك جولة ملكيه لكل المدونات اللي

مازرتها من زمان عنكم مره فقدت جوي التدويني

وبس ايييه صح صح فيه اجازة يالله انبسطوا واقول كل من عندهم ترم صيفي

ياسلام عليكم ألف مبروك تتهنون بالصيفية لمدة شهرين خخخخ < ابد ماتحر قلوبهم

و الي حملوا ورسبوا في مواد قود لاك ان شااءلله < ادري غبار تحملوني

وربي يوفقكم وايانا والله يسعدكم بالنتايج الرهيبة

انتظروا الموضوع القادم إن شاءالله قوي قوي لايفوتكم

واسفه على القرقر هذا اللي ماله فايده بس وش اسوي اشتقت لكم ما أنلام

أأأأأخ ثالث مره أكتبه

HadeeL — Fri, 20 Jun 2008 16:52:37 +0000

يوه ماتصدقون كلما افتح انشاء تدوينه للمرة الثالثة يطير عني كلما

كتبته.. وهالمرة اخذت احتياطاتي في اذا حدث شيء لاسمح الله وطار اللي كتبته

الصيف قرب والسفر حان طاريه وقبل اسبوع كنت طالعه أيام الغبار زحمة سيارات على مكاتب

السفر ! ياساتر كل ذولي بيهجون من الرياض نتمنااالهم سفر سعيد وعقبالي ألحقهم

على قولة قراشيع واحد يروح ومايدري إلا الناس تلحقه

وايام الاختبارات ماخلصت واشوف ماشاءالله زحمة اختبارات بالاسواق والشوارع

ملياااااانه سيارات ماكأن عندهم اختبارات طبعا ماستغربت دايم احنا شعب يحب الزحمة

السوق وما أدراك مالسوق تصدقون أكره الدوران فيه ! ابغى أخذ حاجتي و أطلع

أو أروح لمحل فلاني أو المطاعم إذا كنا بنتمشى ومن باب تغيير جو

تدرون الواحد مايدري وين يطلع بالرياض ملياااااانه أشياء سوق ولا مطعم وتحتار فيهم ؟؟

ويبقى السؤال وين تطلع سوق ولا مطعم ؟ شي محير فعلا

المهم مره من المرات كنا طالعين لمركز صحارى ع المطاعم

طبعا هذا المتنفس الوحيد في المراكز التجارية المطاعم في وقت الويكند

واثناء ماندور لنا طاولة بالزحمات وتدرون أن شعبنا يقدس شيء اسمه

بارتشن عشان تاخذ راحتك على الآخر ولا أحد يشوفك ولا شيء

والقالكم شيء عجيب !! بهذا البارتشن ركزوا عليه:

ركزتوا عليه ؟ شفتوا هذا الشي الأسود وشو؟

عباية سودا معلقه فوق البارتشن !!

ياسلام والله يحسبونه مخيم ؟ وش هالمنظر؟؟؟

ومره ثانية شفت نفس الحركة في (وزار) الوزار اللي يلبسونه بعض الناس شكله

قماش ويلفونه حول الخصر !!

خخخخخخ ماوقفنا عجايب شفتوا!! مالحقت اصوره عشان تكحلون بعيونكم

ومرة شفت ناس من جنسيه عربية زايحين الطاولات في وسط البارتشن

كانوا شارين بطانيه عليها عرض 15 ريال وفارشينها بالأرض وتاركين الطاولات

وجالسين عليها !! والله منظر عجيب فعلا..

الشي الثاني لاحظت عدد من الأطفال من الجنسية العربية يلعبون بالسوق وكورة !

ويالله خووووش عليه ومتحمسسسسسين والناس تشوف هالمنظر ؟؟

وين ياعيال وين قاعدين هذا سوق؟؟

هههههه المنظر المضحك هو مطاردة السيكيورتي وراهم ويلاحقهم يبي ياخذ الكورة منهم

ومحاولته بائت بالفشل خخخخخ مامسكهم

ولا وتدرون السوق صار منتزه الكل يجيب قهوة وشاهي ولا اشياءه من بيته

ويجلس بالطاولات ويتقهوى ههههههه طيب وراكم ماتقهويتوا بالبيت ؟ مستعجلين على السوق ؟

طيب تقهووا في بيوتكم وتعالوا مو تجيبونه معكم والله منظر يفشل صراحه يمكن قصدهم من

باب تغيير جو بس المنظر بايخ جايين للسوق ومعاهم قهوتهم

اللي حبيت أقوله أن كل مكان وله آدابه العامه وكل مكان يختلف عن الثاني

مما قرأته هنا عزيزي القارئ< تكفين ترفقي فيهم

لاحظت بعدد من السلوكيات السيئه في داخل السوق ولازم تحترم الناس

الموجودين حولك فهذا المكان عام مو لك لحالك ..

وسلامتكم

للي يكرهون القطاوة

HadeeL — Fri, 30 May 2008 03:12:20 +0000

أهليين

يوه من زمان ماكتبت أدري

مدري وش جاني زي حس التبلد بس جتني سالفة غريبه جدا

حكتها لي أختي عن وحده تقرب لاهلهم والسالفة حاصلة قريبة ونعرفهم

والقصة واقعه حقيقة بدون تخريف

تخيلوا ياجماعه فيه أم وبناتها وولدهم كبره بالثانوي

اتفقوا انهم يروحون استراحة بالليل عشان يغييرون جو

اخذوا استراحة وعقب مادخلوا

ومادروا الا هذوليك الشباب طبوا بالاستراحة

ربطوا الولد عشان يمسكون البنات الأم على طول هي وبناتها ركضوا وانحاشوا

دخلوا لغرفة وسكروا عليهم الباب

والا مادروا الا وعلى طول جو رجال كثيرين ملتحين وقال واحد منهم: لاتخافين احنا الهيئة

وانتم روحوا واحنا بنهتم فيهم

وعلى طول طلعوا من الاستراحة

والحرمه مييييته من الروعه مانامت وتفكر باللي حصلهم بيومهم

ويوم تصلي الفجر و غفت شوي وفتحت عينها وتلقى نفس الرجال

اللي قالها لاتخافين احنا الهيئة

قال: احنا القطاوه اللي توكلينا كل يوم !!!!!!!!

الحرمة هذي مسويتلهم حوش صغير وتحط كل يوم اكل للقطاوة

سبحان الله صدق شي يخوف وشي مدري وشو عجيب صراحة

بسم الله علينا شوفوا شلون متجنسين بقطاوة

يعني الواحد يخاف لايقعد يطقهم او اي شي ويسمي بالرحمن الرحيم دايم

لاشافهم مو يقعد يرمي جزمته عليهم خخخخخخخخ

اذكر صديقتي ن تقول دايم اذتنا قطاوه ونقعد نرجم عليهم

بكافة الوسائل المتاحه هههههههه بسم الله عليكم

ماودي افضح اكثر بس الظاهر لاقروا هذا بيهونون عن الضرب والرجم

وسلامتكم من القطاوه

ايه ترى سني بدى يوجعني الله يعين

رحمهم الله

HadeeL — Fri, 16 May 2008 17:10:33 +0000

غفرالله لهديل الحضيف ولخالتي ام عبدالعزيز وارحمهم

وعافهم واعفوا عنهم ولكل موتانا وموتى المسلمين

رحمهم الله واسكنهم الجنه يارب

يارب ادخل من احببناهم الجنه

اللهم اغفر لنا ولجميع المسلمين الاحياء والاموات واهدي جميع خلقك لعبادتك
اللهم ثبت قلوبنا على دينك وامتنا على احب الاعمال اليك واختم لنا بحسن الخاتمه وارضى عنا

وعن آبائنا وامهاتنا والمسلمين اجمعين وصلي اللهم على النبي محمد وعلى آله وصحبه وسلم

أرجو لكل من مر هنا الدعاء لهم بالجنة..والمغفرة و ان يحسن الله خواتيم اعمالنا بالصالحات

Emily Rose :( يمه

HadeeL — Thu, 15 May 2008 06:20:47 +0000

تحذير للقلوب المرهفة الحساسة والخوافة لاحد يقرا < مدري وش أحس فيه يوم أكتب

قررت من غبائي أني اشوف فيلم
مرعب مقتبس من قصة حقيقية ووكله من فيث اللي خلتني اشوفه
والله ياجماعه حسيت بوسوسه غير طبيعية بعد الفيلم

عاد انا موسوسه بزياده تقولون عجيز
هذا وأنا شايفته بالصباح مو ليل
على عكس افلام الرعب اللي اشوفها سخيفه ومقرفه كله على دم وقتل
واشياء غبية ملبوسه هذا لاااااااااا
قصة الفلم مأخوذة من قصة حقيقية
بنت كانت طبيعية ومافيها حاجه
جاها حالة اشتبهوا فيها الصرع
وماهي بصرع بدأت من أول مادخلت الجامعة
في ليلة من الليالي وكانت بغرفتها شمت ريحة حريق !!
راحت تشوف تحسب فيه حريق وماسمعت أجهزة انذار الحريق انذارها
صوت الباب يصفق ويفتح راحت قفلته ورجعت لغرفتها
يوم انسدحت بالسرير تحس احد طاب فوقها ويخنقها وكانها
راح تطيح من السرير!
يوم راح اللي صار فيها خافت خوف مب طبييعي
لدرجة انها ماتقدر تحكي من الخوف
عرضوا عليها طبيب نفسي وشخصه بانه حالة من الصرع
ولازم تاخذ علاجاتها اللي وصفلها
وتجيها حالات تشوف الناس على اشكال مرعبة وشيطانية
جابوها للبيت وطلبوا من القسيس حق الكنيسة يجي يشوفها
على انه علاج ديني خخخخخخخ ياحليلهم زينا
عرف ان البنت مسكونه قام يعالجها بالدين
تخيلوا يقرا عليها ويقولها اطلع
قال اتحدااااك
قال وش اسمك
يقول 654321
ويعيد السؤال ويجاوب نفس الجواب
قال وش اساميكم يالسسسسسته !!
يمه بسم الله وكل واحد يقول اسمه بصوته

وفيه واحد منهم عربي هههههههههه
انا ماشفت تعابيري المحبوسة من الخوف يوم قال كذا
ولا كان اوصفلكم الشكل المرعوب
تحسبوني وقفت يوم شفته لاكملت خخخخخخ
الشي الغريب اللي طلعت بهالفيلم أن اول مره اشوف لهم علاج
ديني يقرأون بالانجيل حقهم زي مشايخنا بالقرأن
ماكنت متوقعه ابد
البنت ماتت لانها ماكانت تاكل ولا شي
واتهموا القسيس حقهم انه موتها لانه كان ينصحها بان ماتاخذ الدواء
اللي عطاها الطبيب النفسي حتى تستجيب للعلاج الديني
لكنه اثبت معه تسجيل صوتي يوم يسوي طرد للجن
التسجيل اظنه حقيقي لانه يوم قريت بالموقع فيه
تسجيلات34 صوت مسجله منتشره

اذا بغيتوا تعرفون أكثر عن القصة والصور والتسجيل الحقيقي
ونصيحة لا تدخلون للخوافين واصحاب القلوب الضعيفة
أدعسسس هنا

فيلم حلو وراقي للي يحبون الأفلام الرعب انصحكم بانكم تشوفونه

للي يحب الرعب بس تراه مب على مسؤوليتي اذا خفتوا
ماقول الا سكنهم مساكنهم والله يحفظ كل المسلمين

مرمطه حريم الله يعين

HadeeL — Sun, 11 May 2008 03:09:27 +0000

امس رحت الى ادارة الاحوال المدنية وبما ان هذه المره الثالثة كل الروحات افشل من الثانية

ولا طلعت البطاقة المشئومه جايه من صباح الله خير وهالمره جبت واسطة فاشلة جدن

دخلت للصالة القى مليانه حريم وكانك جاي بقطار الصعيد على الزحمه

جلست بالكرسي ايه حق الصعيد الي يعور الظهر

وبالكراسي اللي على يميني فيه عجز ماسكتوا ابد

+ طبعا مافيه مويه ولا حمامات عشان الناس يصلون

حارة كاملة جايين عشان يطلعون لهم بطاقات واقعدوا قرقروا فوق روسنا

شفتوا منظر كريكاتيرات الهليل وطاش ماطاش نفس المنظر بالقرقره

دار بي راسي وحسيت اني من الممكن فجاه وبطيح حتى لو على

كرسي الصعيد

وارقام وياليت ماحطوا ارقام مالها سنع في هالوقت قالوا مافيه ارقام والشاشه

يالله تمشي الارقام ببطئ شديد عشان يمرمطون لك ويطلعون الناس ويملون

وحده توها تدخل وماصورت لان من شروط البطاقه تصوير صورة منفصلة شمسيه

راحت وصورت وجت وعطوها رقم الروتيني وكان باواخر الارقام الخمسميات استحالة بيمشونها

فجاه تبدل الرقم وسالتها الاستقبااااال وشلون قالت ماني بمعلمتك

خلصت وراحت لبيتها حقدت خخخخخخخ

الثانية عجوز توها داخله بعصاتها منظرها يوحي بفراشة مدرسة

فعلا طلع علي صح وقالت انها فراشة مدرسة وان بيغرمونها اذا ماطلعت بطاقة

الغرامه توصل 10000 ريال < انا فكيت خشتي بهذه اللحظة

ذي العجيز لو تشوفونها يالله تمشي وبعصاتها

هي وبناتها حالتها حاله من وين تطلع عشرة الاف اذا ماطلعت البطاقة ؟؟

اشوف طالبات تغيبوا عن المدرسة طبعا من بينهم اختي عشان يطلعون لهم البطاقة

لاختبارات القدرات مايسجلون الا ببطاقة الاحوال!!!

طيب اللي ماقدروا وش يسوون؟؟ يزورون؟؟؟

يقعدون ببيتهم يعني ؟؟؟ ايه هذا اللي يبون طبعا

عشان يلقون لهم حجه مافيه كراسي !!

والتسجيل بينتهي بالاسبوع واقعد يا حمار لين يجيك الربيع

البطاقة من الممكن يعني تقعد باسبوع اسبوعين بالثلاثة

غير موعد التصوير ههههههه اللي يطلعونا كانا فيزة شغالات

مو زي الرجال ماشاءالله يطلعون وش ملحهم فيها

ولايتمرمطون زينا مرمطه حريم

اقتراحاتي بدون ماحطها بزبايلهم مع انها روتينيه زي وجيههم

* ايام مخصصة لتسجيل الطالبات

* ايام مخصصة للتعديل وبدل فاقد -يشمل المطلقات والارامل

* ايام للي بيطلعون بطاقات وتوهم يطلعون زي حالتي

* عن طريق الانترنت بدل مانتمرمط يعطونا ارقام

يصير موعدنا مبرمج بالكمبيوتر عن طريقه< وين دورهم في حياة الوزارة

انا دارية حتى الروتين باقتراحاتي

وبعد هذا كله ماطلعت بطاقة

الموعد بالاسبوع الجاي للتصوير < شفتوا المرمطه

طلعت من الوزاره الساعه 2و نص بانتهاء دوام الموظفات

وصلت للبيت قبل مايذن العصر مدري اذن يوم دخلت بعد

يارجال يامحترمين انتم زي حالتنا ؟ ماظنتي

مواقع للتعارف !

HadeeL — Sun, 27 Apr 2008 03:56:01 +0000

كثرة مواقع التعارف عندنا كثر عدد شعر راسك

بنات وشباب وحتى الاطفال والشياب

مواقع مشهورة مثل: الفيس بوك والنت لوق

الهدف وضع صورة اولا صورتك :

بنات ناس يحطون لك صور غير محترمه وصور مزريه

تستحي انك تشوفها مع وضع اسمائهم وعائلتهم مين

يعني اللي يقربون لهم ويشوفون الصور عادي عندهم الوضع؟

والله بنات اغلب اعمارهم بالاربعطش فما فوق بشوي او اقل عمر يحطون صور مخزيه

لارضاء عيون الشباب ولأجل كلمة واو , وياحلوه , وودي اكون معك

ومن هالكلام السخيف

الشي الثاني :انتشار الشذوذ وبشكل غير طبيعي وعيني عينك

لدرجة اضحكني صورة واحد من الشباب: يابنات اللزبيان خلولنا البنات

تجي لك بنت بويه كما هو معروف البنت اللي تقلب روحها

ولد !! هذا موضوع كبير لأن احس باشمئزاز كلما شفت صور

واتحمد ربي على مابلاهم وادعولهم بالهدايه يارب

المخزي في الأمر ان الناس يشجعون هالفئة

ويعطون ردود تعطي بايجابية افعالها وان هالشي مو غلط

ولا حرمه الدين بالتشبه بالرجال ولا افعال الرجال

بنات كثيرات شفتهم نفس النمط

ونفس الستايل التقليعه الشبابية الذكورية

واشوفهم في انتشار علنا مو زي اول كان بالدس

وافعالهم بعد عادي عند مرئى كل الناس

مو بس البنات بعد اشوف العيال بعد كاثرين من هالفئة

وحاطين صورهم بمناظر مؤسفه وتقليعتهم البنوتيه واهتمامهم

باشياء بنات ولبس بنات يعني عكس البويات

الشي الثالث: شباب بتقليعات غربية مثل النقرز أو بما يتسمون

بزنوج أمريكا واشكال العصابات بشعر او صلعات حالقين على الزيرو وحاطين لك منديل مربوط

كانهم شغاله

تشبه فيهم ووضع اكسسوارت وملابس والبندانه وسلاسل وحلق حتى الصليب لدرجة العمى أنهم نسوا

دينهم الاسلامي من وضع هالخرابيط الي يحطونها فيهم

وكله لعيون الفرق القانقستر عصابات امريكا وعيال شوارع لأن الشي هذا رهيب وشي

كول ياسلام عليهم

ماقول لاتلبسون بس التقليد الأعمى يجر لأشياء ثانية

والشي الزايد عن حده بينقلب ضده

الشي الرابع: كثرة الأطفال المشتركين في هذا الموقع

وكلما شفت صفحة فيها طفل أو مراهق يضيق صدري من جد

على الواقع الأليم مستهدفين من بنات كبار بالسن او الشباب

وتعليقاتهم الجنسية السخيفة والصور اللي يحطونها

من جد شي مريض اللي نشوفه حرام عليهم

يعني اطفال بأعمار كذا يتعاملون كذا

وردودهم عليها شي يعور القلب

ألحين في عصرنا هذا < تتعب من هالكلمة خخخخ

يعني كل المجال مفتوح ومافيه رقابه أبدا مو مثل أول

كنا نخاف عليهم ونحكم ونسيطر فيهم

ألحين لا الوضع تغير للأسف للأسوء

أفلام , أغاني , فيديوكليبات, انترنت ومواقع تشات وتعارف

واشياء تقرف الله يسترعلينا

انا اعترف عندي يوزر بكل الموقعين اعلاه لكن يوزر قطيه مثل مايقولون

نشترك فيه ثنتين او اكثر بس نشوف الناس < مثل ماتعرفون لقافة عرق دساس فينا

بس للأسف كل يوم يزيد من جد شي يضيق الصدر

واكتشفت ان هالمواقع مالها داعي وتضييع وقت

بس عشان تحط صورك ويعلقون عليها ورسائل خاصة

وقروبات مدري وش تبي من الحياة واذا كنتم

تحبون اللقافه تفرج وتحمد ربك ..

الورد قميل

HadeeL — Tue, 15 Apr 2008 03:42:22 +0000

الموضوع يحتوي على صور مصغره اذا ضغطتها تنفتح بشكل اكبر

الورد قميل .. قميل الورد

رحنا على مهرجان ربيع الرياض (مهرجان الزهور)

وفي الساعة السادسة ونصف تقريبا وصلنا من الزحمات

وماشاءالله جايين كل العالم

دول الخليج واهل الشرقية وبعض القرى

ويالله يالله وقفنا عند البوابة عشان ننزل

دخلنا طبعا عوائل فقط ممنوع الشباب مالهم داعي <

المهرجان منظم نوعا ما كل واحد ماشي بطريقه..

بس عتبي انه حرررر مره وماحطوا رشاشات مويه لانه زحمه والجو حار

طول الممر كله ورود وزهور باشكال تحفففه

صورت بعضها عشان اوريكم

< ايه هين بعضها مابقت شي الا وصورت خخخخخخ

هنا تشوفون صور ممر الزهور

تحسبون ان الزهور الحلوه هذي سالمه ؟

شفتوا الورد الكبير مره يقطفونه العيال وابائهم وامهاتهم

ماسلم من التنتيف

وشوفوا الممر على طول بالصوره هذي

الصورة ابلغ من الحش

وفرحانين يدعسون ويقولون دعسنا وردهم سخافه

ولا ناس من جنسية عربية شافتهم امي وانهبلت

كانوا حاطين بالممر حجر مستورد امريكي ازرق

مسوينه على شكل نهر

ويجونك ويقولون للبزراين خذوا خذوا ويحطون بشناطهم

ومافيه حارسها مدري وش سنع هالحارس

بعدها يجونك سعوديين ويسون نفس الشي يلقطون الحجر

وجت امي وقالت لهم انتم ماتستحون على وجيهكم تسرقون

هذي سرقه وحرام عليكم مسوين عشان تنبسطون وانتم

تشوهون بالسرقه وتخريب المنظر

قالوا لا يا اختي ماسوينا شي

وتكذب البنت وامي قالت لها

انا شايفتكم تحطونه وهي خايفه ومستحيه وسكتوا كلهم

بس هاوشت الحارس يوم قالت له انت وش سنعك يوم

انك قاعد بالكرسي ولا تقول لهم شي؟

قسم بالله شي يقهر والله ناس همج

=============

وهنا الله يسلمكم بعض من مشاركات المدارس

مافيه الا مدرستين اللي هم : معهد العاصمة النموذجي

و مدارس الرياض

وفجاه طاحت عيني على الولد المنسم اللي راسم هاللوحه

هههههههههههه المصريه بنفسها تقول والله ماحدش

واخد بالو منك يابني آآآآل الملك عبدالله آآآآل < ياحبهم للتميلح

احلى شي عجبني الجدار القماشي اللي يشخبطون فيه

مسوينه معهد العاصمة وهذي صورته

بعدها

مشاركات الجامعات:

جامعة الملك سعود , جامعة الامام, جامعة سلطان

=============

اذن العشاء وكان فيه هيئة يقولون الصلاة الصلاة ياعباد الله

مسك له واحد مريض شايب وشكله تعبان جاته الجلطه اتوقع لأنه يرتجف

وشفايفه بعد ترتجف ويمشي زي الاعرج من جنسية عربية

قاله يالله الصلاة تعال قاله طيب انا مش على طهارة بروح للحمام ان شاءالله

قال لا تعال معاي على الا انا اعطيك مويه واخليك تتوضى ومصر الا انه يروح معه

قال الحين قلتلك ماراح اصلي ؟ قلتلك مو على طهاره وبروح الحمام

قال بس انت رفضت تروح معي ولازم تمتثل للاوامر بالمعروف

قاله شوف الحين اللي كل الناس يمشون ومالقيت الا انا تتسلط علي

الا انا ؟؟والدين يسر وليس عسر وانا انسان تعبان والله ماقدر امشي المسافة

راح اصلي لحالي لان المكان بعيد وراح اروح الحمام ماقلتلك انه ماراح اصلي

قال انت تعلي صوتك علي ومدري ايش قال انا اقول الصدق الحين ليش ماتأمر كل الناس

وجا واحد ملقوف مو فاهم وش السالفه بس وقف وقاله الهيئه لهم صيت معروف

ولازم تتمثل للاوامر وتجتنب النواهي سفهوهه

عاد مسكه واحد كان معه مشارك بالمعرض وقاله ياخي كف الشر

وقل لا اله الا الله انت انسان مؤمن ويكفيك اللي فيك (قصده مريض)

عاد انا شفتهم مشوا الرجال بطريق واللي من الهيئة بطريق ثاني

وكل واحد يتمتم بشيء من الغضب

=============

بعدهارحت للساحة فيها مطاعم وفيها مسرح اطفال وفيها ساحة كبيرة

عند ملعب الجامعة

بنات يجون عند الشبك ويتميلحون عند العيال اللي يتدربون

من بعيد

والله اللي مادروا عنهم وياشرون والسيكورتي يضحك عليهم ويتحمد ربه شكله

المسرح بدأ وجايبين لك فرقة مدري وشي جايبين معهم ميكي وميني ماوس

انواع الضحك بالرقص والهيئه فاصلين عن الرجال والحريم جزاهم الله خير

بس شكله انهبل من ميكي وميني

عليهم رقص مب صاحي

فاصلين قسم بالله والله ياني ودي اتسدح من الضحك على الثيل

ياحبيلهم الله يوسع صدورهم كلما تذكرت المنظر

=============

تدرون كيف انقرضت الديناصورات؟

كان يامكان فيه ديناصورات بالساحة

اكتشفوها العيال اللي من العصر الحجري وبدأوا ينتقمون منها وهي مسكينة

ماسووت لهم شي

شفتوا وشلون ؟

الحين تطلعون من البوست هذا باشياء مفيدة

حتى لو اني كثرت هذرتي اعذروني والله بس حبيت اني اطلعلكم

بوست مب صاحي خخخخخ والله اني تعبت وياويلكم ان ماسويتو كومنتات

ترى بصيح

ومو حرام ان جهود الأمانه يقابلها عدم المبالاة والاهتمام من

بعض الأهالي ؟

والله حليو المهرجان مب شين وممتع للاطفال خاصة

فيها اركان للرسم والتلوين ومسابقات عليها و

متاهه للتفكير وتعليم الاطفال والعاب

بس اللي يضيق صدرك ويحز في نفسك

هالنوعية من البشر اللي ماهمهم أبد الا سوء

الادب والاهتمام المعدوم من قبل بعضهم

ويشجعون عيالهم على التخريب والفساد

خلاص من جد ياعالم ياهذي الفئة احرصوا على مستقبل بلدكم

خلونا نرقى بتصرفاتنا بتفكيرنا مو نصير كذا ولا نعطي اهتمام

وربوا عيالكم ولاتخلونهم يسوون حركات الهمج هذي ترى

بسطرهم ان شفتهم قد اعذر من انذر

ايه نسيت كورة نوير اختي ههههههه

ان شفتوها ذيك اليوم فهي هي اللي تمشي معها كورة صفرا

ويصقعونها الناس < فضايح

التقرير المفصل والمفصول جدن تعود حقوقه لي

من صور وتعليقات والموضوع بكبره

فرجاءن مابي سرقات من هنا وهناك الا باذني

وتحطون رابط موقعي عليه والله ماحللكم اذا شفت لكم تنسبونه لكم

< مقفله معها

الخير يعم والشر يخص

HadeeL — Wed, 02 Apr 2008 15:05:01 +0000

أهلين بكافة الشعب

عندي قصة لكم وتبغى ارائكم

صح مواضيع الهيئه ملينا منها ومايندرج من سلبيات وايجابيات

وقصص واخطاء الهيئه التي لاتعد امام ايجابياتها

لكن ماقول الا زي العنوان الخير يعم والشر يخص

وكثرت مره قصص الهيئه بالسلبيات

انا والله مؤيده جدا للهيئه اللي يناصحونك باحسان وصح واسلوب يخليك

تستحي مافعلت

اما للهمج لا والله الله يهديهم ويهدينا ويصلحهم ويصلحنا

قولوا امين

حدثت هذه القصة في المساء مادري هو الاربعاء او الخميس بلسان

صديقة اختي اللي حصلت لهم هذه الحادثه

كانو مجموعة من عيال وبنات وكلهم عيال اعمام او اخوال

العيال يودون البنات وكلهم بسيارتين

سيارة للبنات وللي ماكفى ركبوا اتوقع بالسيارة الثانية

ومعهم واحد مشلول الله يرفع عنه وعن كل مسلم

الشاب هذا اول مره يطلع من بيتهم واقنعوه بان يغير جو من حبسة البيت

لايطلع ولاشي فاخذوه معهم وهنا تبدأ القصة

فحال الشباب هالايام كلهم يرفعون صوت الموسيقى بالسيارة

لاعلى شي < قسم لاوقفنا جنب هالسيارات ان قلبي

يرقع واقول شلون مايعورهم قلبهم وروسهم خخخخخخ

وصلوا للمقر اللي بيودون لهم اللي هو ملاهي ستار سيتي

فجاه مايجونك الا مسرعين سيارة الهيئه وفيها كم شخص

ويفتحون عليهم الباب يالله انزلوا

انزززززلوا

قالوا وش فيك وش مسوين ويهاوش وينافخ عليهم

يحسبهم من ربع الفرندات

قال هذي اختي والباقين اقارب قال وش يثبتلي

قام ويكلم على ابوه وابوه بعيد في العاذريه ومشوار على بال مايجي

وشاف واحد منهم جالس مانزل مع الشباب اللي هو المشلول اللي مايمشي

قاله انزل قال ماقدر ويكرر عليه ويرد عليه انه مايقدر

قام وسسسسحبه مع يده ويطيحه بوجهه على الشارع

ويتصلون على ابوه ويجي طاير ومسرع ووصل لهم وتفل بوجهه اللي طيحه

ويهاوش ويدعي بان يصيبه بما اصابه بابنه ويبتلي بعياله وهو يقول

تكفى ياعم خلااص حس بالوضع وخايف من الدعى وخايف يوصل

اللي صار فيه عند المسؤولين

هو يبي يمشي اموره على كل راس بالف زي الغنم وماحس

بخطورة ووضعهم الخطأ

مادري وش صار بعدين بس هالولد المشلول المسكين

قام تعقد ولا عاد يطلع معهم ولا شي وكانه اللي يقول ياليتني

ماطلعت معكم ولاطاوعتكم

ينرحم صح .. ؟

سني :(

HadeeL — Mon, 24 Mar 2008 08:17:47 +0000

ياجماعة من فيكم يحب العيادات ودكاترة الاسنان ..؟؟

اكيد ولا احد .. اييه انتم مثلي

قبل ايام عورني سني بقوة وبسبة علكة طولت فيها

وتخيلوا مانام ولا شي ونفسيتي جدن زفت

وارسي يوجعني زي مايقولون ماهم الاهم العرس ولا وجع الا وجع الضرس وكنت متعيجزة اروح وغصب

رحت للعيادة وقالت لي الدكتوره ان حشوتك

اللي حاطينها قدييييييمه وكان من مستشفى التخصصي

الله يقلعهم ومتعرضه لبكتيريا يمممممه

خفت والله وش هالشي اللي جاني بعدين وخرت الحشوة القديمه

وحطت وحده مؤقته .. وعطتني ادويه وقالت بعد اسبوعين تجين لانه لازم يتعالج

وراح تشيل العصب برضو

عاد انا ازمتي وحساسييتي من المضادات الحيوية لما اخذها كانه يحترق

جسمي واخذ بنادول والشكوى لله

معليش ياجماعة الخير انا تعباانه وربي ولا رديت عليكم

سوري ولا حليت واجب استاذتي مضيعه بيتهم :( تكفين هذا عذر طبي

بس لاتنقصيني

جعلكم ماتشوفون اللي عانيته

قسم حسيت اني عجيز بهالبوست هههههه ماغير اتشكى

ويا راري تكفين لاعاد تقولين لي شي كلما قلتيلي شي

جااااني

ذيك اليوم كانت ماتنام وجايها ارق وبسم الله جاني ههههههه

وتكلمت عن سنونها وحالتها صعبه مسكينه

وجاااني خخخخخخ الله يرج بليس

ذكرتيني بخالتي وامي اذا قالوا لشي بعض يجيهم

سبحان الله

< ودها كانت تفضفض وفضفضت

شكرن لا الكم ولكل اللي ارسلولي

الحمدلله انا الحين احسن من اول بكثير